Siquey

***Since walang masyadong tawag sa opisina, ilalatag ko sa aking poso-negro ang mga nakaraang exercises namin sa LIRA (Linangan sa Imahen, Retorika at Anyo). Sa abot ng aking memorya, ipapasok ko ang mga komento, at suhestyon ng mga matador ng tula, gayundin ang mga mahahalagang nangyari na sa tingin ko ay karapat-dapat na banggitin hinggil sa mga nangyaring palihan.***

Ito ang unang "pormal" na exercise namin sa LIRA. May ipinagawa sila bago dito, pero parang pampainit lang yun. Si Sir Mike Coroza ang aming chief matador. Nasa likod noon si Sir Rio, kaso hindi na niya naabutan yung pagbasa sa hapon kasi may lakad siya after lunch. Kailangan naming gumawa ng iba't-ibang dalit, tanaga at awit na nasa antas ng tudlikan. Ito ang aking mga nagawa:

Maragsa a + Kung Puso ko ay Mukha

Kung puso ko ay mukha
At titibok sa mutya,
Damdamin kong may sigwa,
Mapansin na n'ya kaya?

Maragsa e/i + L.Q.

Tumiklop man, 'yong ngiti,
At makanti ang sidhi,
Sa'ting bawat paghikbi,
Luhang kristal ang binhi.

Maragsa o/u + Game Over

Hinabol ka't lumayo.
Sa pagtayo'y umupo.
Dating basa'y natuyo
Tapos na ba ang laro?

Siquey

Ang second exercise namin sa LIRA ay ang paggawa ng dalawang awit tungkol sa kantina. Dapat ay may sesura, gumamit ng tamang balangkas (pasuhay, pasuysoy, patimbang),  at ang tinig ng tula ay dapat na nagluluksa at nagpapatawa. Narito ang mga utot ko:

Nagluluksa

Wala na ang kinang ng mga kubyertos.
Mga mesa't silya, may kumot na sapot.
'Siniksik ang plato't palayok sa sulok
Ng lumang kantinang hindi ko malimot.

Pagkat alaala'y nakakalat pa rin:
May bakat ng labi't palad sa salamin,
May pait at hapdi ng dilang matalim,
May alat ng luhang tuyo't naging asin.

Nagpapatawa

Sa aming kantina, mayro'ng pag-aaklas;
Mga kasangkapa'y lihim na rumesbak
Dahil nais nila'y lantarang ihayag
Kung ga'no kapalpak, gamit na de-saksak.

Microwave at blender, bodega ang bagsak.
Rice cooker sa kahon, toaster itinambak.
Ang heater gininaw, ang ref ay nilagnat;
Lahat ay lumuhod nang kable'y pinigtas.