Sa Demolisyon
Sa Demolisyon
ni Charles Bonoan Tuvilla
Tapos na. Ngunit tuwing may tumutuntong
sa guho, muling ipinupukol ng mabibigat na kalabog-
lata ang mga nagliparang bato at putanginaninyo kanina.
Hinihingal ang lahat habang nakapatong sa kanya-
kanyang bubong, tila mga batang namumulot
ng mga bumagsak na guryon. Nakakalat ang mga walang
pares na tsinelas. Nauna pang dumating
ang bulaklak na galing kay Mayor kaysa
kay Mang Elias. Nakasandal ang kanyang maybahay
sa naiwang poste ng dati nilang tindahan; wala pa ring
nag-aabot ng bayad sa utang. Sa C5, buong-ingat
na isinilid ng paslit ang kahon ng posporo
sa mababaw niyang bulsa. Kailangan na nilang
umuwi. Basta. May tiningala siya sa langit, at panay
billboard ng Wowowee ang nakita. Pumalakpak siya,
at sumugod ang pulutong ng mga kalapati,
naghabi ng sansaglit na silong sa kalawakan.
soulfly
Siquey
soulfly
Siquey
soulfly
soulfly
